Bekubungazwa impumelelo yabahlomula ohlelweni lokuxhasa abafundi emfundweni ephakeme
01 December 2022
iSimangaliso Wetland Park Authority sesiphinde sasingitha isidlo sakusihlwa nabafundi abahlomula ohlelweni lokuxhasa abafundi emfundweni ephakeme. Lokhu bekwenziwa ngenhloso yokubungaza labo abaxhaswe iSimangaliso kulolu hlelo okuwukuthi abanye babo bazobe begqoka imiyezane ngonyaka ozayo.
Lolu hlelo lunika uxhaso lwezemfundo entsheni esuka emphakathini engomakhelwane nepaki ukuthi ithole imfundo ephakeme emkhakheni ehlobene nokongiwa kwemvelo, ezokuvakasha kanye nokuthuthukiswa komphakathi. Kuyiqiniso elingephikwa ukuthi ukongiwa kwemvelo ngaphandle kwabantu ngeke kwaphumelela. Noma kunjalo, ukonga nabantu wongele abantu kuyindlela okufanele sihambe ngayo ukuze sizoqhubeka silondoloze le ndawo. Izinhlelo ezinjena zivumela iSimangaliso ukuthi siqinise ubudlelwano baso kanye nemiphakathi engomakhelwane.
iSimangaliso singaphansi kwesifunda uMkhanyakude okuyisifunda esikhungathwe ububha kakhulu kulelizwe. Le ndawo ibonakalisa ngezinkingana zenhlalo yabantu okufaka phakathi ukungalingani, ububha kanye nezinga eliphezulu lokuntuleka kwamathuba omsebenzi. Muva nje ngokwezibalomdanti izinga lokuntuleka kwamathuba emisebenzi kuvela ukuthi kuhleli kumaphesenti angamashumi amane nambili (42%) kulesi sifunda. Lokhu kunika iSimangaliso inselelo enkulu yokuthi kumele siqinisekise ukuthi silwisana nobubha kule ndawo ngokuthi sinike amathuba emisebenzi nokusungula uhlelo lokuthuthukisa umnotho emphakathini yethu yasezindaweni ezihlwempu.
Lolu hlelo olunye lwezinhlelo ezimqoka olunika amandla iSimangaliso ukuthi siguqule umlando mayelana nesifunda saseMkhanyakude, iSimangaliso sifuna ukuqinisekisa ukuthi intsha yalesi sifunda iqeqeshekile futhi ilutholile usizo olwanele ngamakhono abalulekile kwezokongiwa kwemvelo, ezokuvakasha nganye neminye imikhakha ehlobene nalena. selokhu lwaqala ngo-2010 lolu hlelo, seluxhase intsha eyikhulu namashumi ayisihlanu nesikhombisa (157) ukuba ithole imfundo emabangeni aphakeme kanye nokulekelela abafundi ngokubaluleka ngokomqondo ukuze basheshe bajwayele izindawo zasemadolobheni futhi ukuthi baphase izifundo zabo. Abafundi abayikhulu namashumi amathathu nesishiyagalolunye abahlomule kulolu hlelo sebegogodile futhi bangaphezu kwamaphesenti angamashumi ayisothupha (60%) abasebenzayo, okuwukuthi amaphesenti angamashumi amabili nanhlanu (25%) abo aqashwe iSimangaliso.
uSibongakonke Mdletshe) osanda kugogoda eNyuvesi yakwaZulu-Natal kuziqu ze-Bachelor of Art. “Kube inhlanhla ukuthi ngibe ngomunye oxhaswa iSimangaliso kulolu hlelo ngiphinde ngiqashwe iSimangaliso njenge-intern”. Kusho uMs. Mdletshe ululeke abafundi wathi kumele banake kakhulu izifundo zabo futhi uma bekhetha abangani kumele behlakaniphe ngoba abangani ababi bengase bebaphazamise ezifundweni zabo.
(UYamukelani Zwane) ongomunye ohlomule kulolu hlelo lwe-Simangaliso Tertiary Education Support Programme, ugqoke imiyezane ngonyaka ka-2015 egqokela iziqu ze-Bachelor of Community Development Studies. Kube inhlanhla futhi ukuthi aqashwe iSimangaliso ohlelweni lwe-Rural Enterprise Development. UYamukelani udlulise amazwi enkuthazo kubafundi waveza ukuthi kumthathe iminyaka eyisithupha ukuthi athole umsebenzi wase eluleka abafundi ukuthi kungabaphathi kabi ukungawutholi umsebenzi futhi bengalahli ithemba ngoba uma sekufike isikhathi izinto zokwenzeka.
USandiso Zikhali ungomunye wabahlomule kulolu hlelo, ubonge iSimangaliso ngaphansi kwabahlomula kulolu hlelo waveza ukuthi uxhaso abaluthole kwiSimangaliso lube usizo kakhulu. Imali, usizo kwizifundo kanye nokulekelelwa ngokomqondo kubasize kakhulu ebunzimeni ebabhekane nabo ezifundweni zabo.
iSimangaliso Wetland Park Authority sizoqala ukuthola abazohlomula kululo hlelo ekuqaleni konyaka ozayo, labo abanentshisekelo kumele babheke iSimangaliso kusukela mhla kuyishiyaglulonye kuya kuyizishumi nantathu kuMasingana 2023 kulama nyuvesi abaliwe ngenzasi. Okanye bathole ifomu lokufaka isicelo eSimangaliso kulendalwazi: www.iSimangaliso.com
Okudingakalayo ilokhu okulandelayo
- Abafundi kumele kube ukuthi babhalisele unyaka wokuqala kulamaNyuvesi; iNyuvesi yaKwaZulu-Natal, iNyuvesi yaseZululand, Mangosuthu University of Technology neNyuvesi yase-Durban Central University of Technology.
- Abafundi kumele bafake isicelo soxhasomali luka National Student Financial Aid Scheme futhi kube nesiqiniseko sokuthi umfundi ulutholile uxhaso luka-NSFAS ngonyaka ka-2023.
- Abafundi kumele kube ukuthi babhalise emkhakheni wezokongiwa kwemvelo, ezokuvakasha nokuthuthukisa umphakathi kanye nezinye izifundo eziyamene nalolu hlelo.
- Abafundi kumele babe ngabendabuko eNingizimu Afrika okungakhonwa ukuthi kuqinisekiswe lokho okanye, kube ukuthi basuka emphakathini engama-Land Claimant eSimangaliso, okanye babe ngabahlali baseMkhanyakude ezindaweni ezisondelene neSimangaliso Wetland Park noma umphakathi ongaphansi koMaspala waseMfolozi okuyindawo yakwaSokhulu.
End
-End- Statement issued by iSimangaliso Wetland Park Authority Media enquires: MLO: Mr. Bheki Manzini Call/WhatsApp: 060 533 2082 Email: